حوزہ نیوز ایجنسی کی رپورٹ کے مطابق، مجلسِ علماء امامیہ پاکستان کے زیرِ اہتمام سرگودھا میں ایک عظیم الشان کانفرنس بعنوان ”شہدائے امت“ کا انعقاد ہوا، جس میں حزب الله لبنان کے عظیم قائد شہید سید حسن نصر اللہ کی پہلی برسی پر انہیں خراج تحسین پیش کیا گیا۔ کانفرنس میں پنجاب کے مختلف اضلاع سے علمائے کرام اور مبلغین نے بڑی تعداد میں شرکت کی۔
اس موقع پر مجلس وحدت المسلمین پاکستان کے سربراہ سینیٹر علامہ راجہ ناصر عباس نے خصوصی خطاب کیا اور شہید سید حسن نصرالله کی زندگی، جدوجہد اور امت پر ان کے اثرات کو خراجِ عقیدت پیش کیا۔
علامہ راجہ ناصر عباس نے کہا کہ مرجعیت نے ہمیشہ ملت تشیع کو سرخرو کیا ہے اور یہی نظام ہمارے استحکام اور رہنمائی کا سب سے مضبوط ستون ہے۔
انہوں نے کہا کہ جن حالات میں مقاومت کے محاذ کی تشکیل ہوئی وہ آج کے حالات سے زیادہ گھمبیر اور نازک تھے، لیکن مقاومت نہ صرف تشکیل پائی، بلکہ اس نے اپنی طاقت سے خطے میں توازن تبدیل کیا۔
انہوں نے کہا کہ مقاومت کا وجود نہایت اہم اور ایک فطری مظہر ہے، یہی محاذ ملت کو استکباری سازشوں سے محفوظ رکھ سکتا ہے۔
علامہ راجہ ناصر عباس نے کہا کہ شہید سید حسن نصر الله کی شخصیت عزم و اخلاص کا پیکر تھی۔ وہ اپنی انکساری، شجاعت، زہد و تقویٰ اور اعلیٰ اخلاق کی بدولت دنیائے معاصر کے قائدین میں ایک منفرد قائد تھے۔
انہوں نے کہا کہ شہید سید حسن نصر الله نے حزب الله کو نہ صرف موجودہ، بلکہ آنے والے حالات کے لیے بھی مکمل طور پر تیار کر کے چھوڑا ہے، لہٰذا مایوسی کی کوئی گنجائش نہیں بلکہ یہ وقت امید اور آگے بڑھنے کا ہے۔
انہوں نے مزید کہا کہ شہداء کی قربانیاں ملتوں کو حیات بخشتی ہیں اور ہمیں اپنے اتحاد، شعور اور استقامت کے ذریعے شہداء کے مشن کو جاری رکھنا ہے۔
کانفرنس کے اختتام پر شہید سید حسن نصرالله سمیت تمام شہدائے مقاومت و امت کے ایصالِ ثواب کے لیے دعا کی گئی۔
یاد رہے مجلسِ علماء امامیہ پاکستان بین الاقوامی ادارہ الباقر کا شعبۂ تبلیغات ہے جو ادارہ کے بانی و سربراہ علامہ ڈاکٹر سید شفقت حسین شیرازی کی سربراہی میں مبلغین امامیہ و آئمہ جمعہ والجماعت کی استعداد افزائی اور منظم و مربوط تبلیغی فعالیت کے لیے گزشتہ دس سال سے زائد عرصے سے سرگرم عمل ہے۔
آپ کا تبصرہ